Salah, sem skoraði tvö mörk fyrir Egypta í 3-0 sigri á Níger á dögunum, verður ekki með liðinu í leik liðsins gegn Líberíu á morgun, en Rui Vitoria, þjálfari Egypta, hefur ákveðið að hvíla hann í þeim leik en hann greindi frá ákvörðun sinni í dag.

Hann snýr því aftur til Liverpool og ætti því að mæta úthvíldur í næsta deildarleik enska liðsins sem er gegn Brighton á laugardag.

Salah hefur ekki skorað í síðustu þremur deildarleikjum Liverpool og er aðeins með tvö mörk úr fyrstu sex leikjunum.

Stuðningsmenn Liverpool binda miklar vonir við að hann fari að raða inn mörkum eins og hann hefur verið duglegur að gera síðustu ár, en hann hefur þrisvar sinnum unnið gullskó deildarinnar frá því hann kom frá Roma fyrir fimm árum.