„Þetta var góð frammistaða, hörkuleikur, frábærar aðstæður, hraður bolti, bæði lið að pressa og fullt af færum þannig þetta var skemmtilegur leikur. Þetta voru tvö flott lið á góðum stað, fullt af mörkum og ég var gríðarlega ánægður með pressuna okkar," sagði ánægður Ágúst Gylfason, þjálfari Stjörnunnar, eftir 3-1 sigur sinna manna gegn Breiðabliki í kvöld.
Lestu um leikinn: Stjarnan 3 - 1 Breiðablik
„Við gerðum það sama og þeir voru að gera á móti okkur og þetta var pressa í báðar áttir. Við héldum þeim ágætlega í skefjum, náðum að vinna boltann oft hátt uppi á vellinum og refsa þeim. Mér fannst Blikarnir góðir þrátt fyrir að þeir hafi tapað í dag. Það er gott að fá sigur og sigra Fótbolta.net mótið - frábært,"
Pressa Stjörnunnar var mjög öflug í leiknum og pressuðu þeir andstæðingana mjög hátt á vellinum. Er þetta eitthvað sem fólk mun sjá í leikjum með Stjörnunni í sumar?
„Já, líklega, við erum að leggja þetta þannig upp. Við erum að æfa mjög vel, mikill metnaður í mönnum og menn leggja mikið á sig. Það skilaði sér með þessum sigri í dag og þessum sigrum sem við höfum unnið í þessu móti. „So far so good", við lítum vel út í janúar en það er ennþá langt í mót."
Stjarnan er með urmul af leikmönnum sem eru í yngri landsliðum Íslands, strákum sem eru yngri en tvítugir. Áttu von á því að þessir strákar fari út í atvinnumennsku?
„Ég vona að þeir verði bara með okkur, þetta eru frábærir strákar sem leggja mikið á sig. Það væri frábært að halda þeim í sumar - ekki spurning."
Er ljúfara að vinna leiki gegn Breiðabliki en öðrum liðum? „Nei, ekkert meira. Það er frábært að vinna Fótbolta.net mótið, það er fyrir öllu."
Viðtalið í heild má sjá í spilaranum að ofan en þar var Ágúst spurður sérstaklega út í Jóhann Árna og Sindra Þór Ingimarsson.
Athugasemdir
