Werder Bremen er búið að kaupa miðjumanninn öfluga Jens Stage frá FC Kaupmannahöfn.
Stage var lykilmaður í liði Kaupmannahafnar og gæti þetta þýtt að íslensku miðjumennirnir Hákon Arnar Haraldsson og Ísak Bergmann Jóhannesson fái aukið hlutverk í byrjunarliðinu.
Werder borgar 6 milljónir evra fyrir Stage auk árangurstengdra aukagreiðslna.
Stage á aðeins einn A-landsleik að baki fyrir Danmörku en hefur skorað 10 mörk í síðustu 45 deildarleikjum sínum með Kaupmannahöfn.
Werder komst upp úr 2. Bundesliga í vor og leikur því í efstu deild í haust. Hinn 25 ára gamli Stage hefur aldrei áður spilað fyrir félag utan Danmerkur.
Stage er fimmti leikmaðurinn sem Werder fær til sín í sumar eftir komu Oliver Burke frá Sheffield United sem var staðfest fyrr í dag.
Niklas Stark, Amos Pieper og Dikeni Salifou komu allir á frjálsri sölu.
