Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
   fim 30. júlí 2020 13:24
Hafliði Breiðfjörð
Skallagrímur: Hann bað okkar leikmann afsökunar í þrígang
Gísli Einarsson er stjórnarmaður hjá Skallagrími. Hann er ósáttur við ummæli þjálfara Samherja á Fótbolta.net í morgun.
Gísli Einarsson er stjórnarmaður hjá Skallagrími. Hann er ósáttur við ummæli þjálfara Samherja á Fótbolta.net í morgun.
Mynd: Edda Sif Pálsdóttir
„Það stóð aldrei til að gera mál úr þessu en það fór fyrir brjóstið á okkur að viðurkenna þetta ekki heldur búa til ásakanir um falsfréttir, við líðum það ekki," sagði Gísli Einarsson stjórnarmaður hjá Skallagrími við Fótbolta.net núna í hádeginu.

Sjá einnig:
Sakaður um að hafa hrækt á leikmann Skallagríms
Þjálfari Samherja: Þetta er bara kjaftæði

Guðjóns Gíslason sem er skráður sem forráðamaður í liðsstjórn Skallagríms í leik liðsins gegn Samherja tísti í gærkvöldi að leikmaður Samherja hafi hrækt á leikmann Skallagríms í leiknum.

Sinisa Pavlica þjálfari Samherja sagði svo við Fótbolta.net í morgun að þetta væri kjaftæði, þetta atvik hafi aldrei átt sér stað og að enginn hafi einu sinni nefnt það við dómarann. Gísli segist hafa rætt við leikmanninn sem atvikið snerti, sem og þjálfara Skallagríms og fleiri leikmenn.

„Það liggur fyrir að þetta gerðist og það er mjög undarleg fullyrðin og ásökun sem felst í orðum þjálfarans um að þetta sé kjaftæði. Enda eru fjölmörg vitni úr báðum liðum," sagði Gísli við Fótbolta.net.

„Leikmaðurinn frá Samherja bað okkar leikmann afsökunar í þrígang sem hann hefði varla gert ef hann hefði ekkert til saka unnið. Okkar leikmaður talaði við dómarann strax eftir atvikið og annar leikmaður talaði á sama tíma við aðstoðardómarann. Svo talaði enn annar við aðstoðardómarann eftir leik," hélt hann áfram.

„Það er því fjarri lagi að dómaratríóið hafi ekki haft vitneskju um þetta en þeir sáu þetta samt ekki og höfðu því ekki forsendur til að grípa til aðgerða," sagði Gísli en hann sagði að Skallagrímur hafi ekki óskað eftir neinum eftirmálum af atvikinu. Í ljósi Covid-19 verði menn þó að læra af þessu.

„Við biðjum menn að hafa það í huga að svona gerir maður ekki og sér í lagi þegar ástandið er eins og það er. Við óskum eftir að menn láti þetta verða sér víti til varnaðar. Við búum heldur ekki til sögur um leikmenn og að sitja undir því er óþolandi. Eðlileg viðbrögð þjálfara Samherja hefðu verið að biðjast afsökunar."
Athugasemdir
banner
banner
banner
banner