ÍBV og Keflavík gerðu 2-2 jafntefli í Þjóðhátíðarleiknum í 15. umferð Bestu deildarinnar.
Lestu um leikinn: ÍBV 2 - 2 Keflavík
ÍBV komst tvisvar yfir í leiknum og voru heppnir að tapa ekki undir lokin. Hermann Hreiðarsson þjálfari Eyjamanna segir úrslitin sanngjörn.
„Í heildina er þetta nokkuð sanngjarnt. Í fyrri hálfleik fengum við rosa fín færi þannig að þetta var sanngjarnt. Það hefur aðeins meiri kraftur í okkur í síðustu leikjum en völlurinn virkaði helvíti þungur. Við spilum þannig leik að þetta eru læti og hlaup, þetta var þungt í restina," sagði Hemmi.
Hann gefur leikmönnum ÍBV leyfi á að skemmta sér frameftir um helgina en eins og flestir vita er Þjóðhátíð í Eyjum um helgina.
„Það eru allir búnir að bíða eftir þessu með eftirvæntingu í nokkur ár. Klefinn er heilbrigður og flottur og stemningin er samkvæmt því. Framlagið og krafturinn í hverjum leik, þetta er rosa flottur klefi, eftir erfiða byrjun sýna menn úr hverju þeir eru gerðir. Við erum komnir á ágætis ról, þessi klefi á allt hrós skilið og það er engin spurning að menn mega njóta sín í botn."
ÍBV mætir KR á Meistaravöllum um næstu helgi.
