Haraldur Árni Hróðmarsson þjálfari Grindavíkur gaf kost á sér í viðtali eftir slæman tapleik í fallbaráttu Lengjudeildarinnar.
Lestu um leikinn: Völsungur 2 - 0 Grindavík
Grindavík tapaði 2-0 gegn Völsungi á Húsavík og er aðeins einu stigi fyrir ofan fallsvæðið þegar tvær umferðir eru eftir. Liðið á eftir að spila við toppbaráttulið ÍR og Njarðvíkur í tveimur síðustu umferðunum.
„Mér fannst þetta vera nokkuð jafn leikur bara fram og til baka og ágætis skemmtun, en fyrstu tvö skot Völsungs fara inn í markið okkar. Á sama tíma höfum við tonn af skallafærum og fullt af möguleikum til þess að skora en allt kemur fyrir ekki þannig að ég er svekktur. Þeir skapa sér einhver færi hérna í blálokin þegar við erum komnir allir fram en þeir komust í 2-0 úr tveimur hálffærum og það er blóðugt," sagði Halli að leikslokum.
„Völsungar fóru ekki yfir miðju í eitthvað korter þarna eftir fyrsta markið. Það er nokkuð ljóst að við þurfum að gera eitthvað meira úr því. Að einhverju leyti verjast þeir bara vel en ég er hundsvekktur að hafa ekki skorað mörk í þessum leik og að hafa fengið tvö mörk á okkur í þessum leik finnst mér vera rannsóknarefni.
„Við horfum bara á næsta leik í þessu og við vitum það að við þurfum fleiri stig. Við erum ekki með stigafjölda sem dugar okkur þánnig við verðum að láta þetta gerast. Við eigum ÍR heima í næsta leik og við þurfum bara að vera klárir í hann. Við spiluðum að mörgu leyti vel í dag og getum byggt helling á því, en það er orðið þreytandi hvað við lekum mikið af mörkum og hvað þarf lítið til svo að við fáum á okkur mark. Ég er að óska eftir því frá mínum mönnum að vera sterkari í báðum teigunum."
Tveimur leikmönnum Grindavíkur var skipt af velli í fyrri hálfleik vegna meiðsla. Þeir hafa báðir verið að glíma við meiðsli að undanförnu og telur Halli ekki að um alvarleg meiðsli sé að ræða.
Athugasemdir
