Franski vængmaðurinn Ousmane Dembele segir að Paris Saint-Germain væri mögulega betra lið með Kylian Mbappe innanborðs en án hans, en þetta sagði hann á blaðamannafundi fyrir úrslitaleik PSG gegn Inter í Meistaradeildinni.
PSG mun í annað sinn í sögu félagsins spila í úrslitaleik keppninnar, en frammistaða liðsins hefur verið hreint út sagt frábær á tímabilinu.
Frakkarnir spila meira eins og lið núna en þegar Kylian Mbappe var á mála hjá félaginu.
Hann yfirgaf PSG síðasta sumar og gekk í raðir Real Madrid á frjálsri sölu, en margir voru á því stjórstjarnan hafi haldið liðinu aftur. Dembele er hins vegar ekki endilega sammála því.
„Er þessi leikur auðveldari án Mbappe? Nei, kannski værum við enn betri á þessu tímabili með hann innanborðs. Mbappe átti sér þann draum að spila fyrir Real Madrid, en PSG hélt áfram á sömu braut. Það er hægt að segja að það sé tími fyrir og eftir Mbappe,“ sagði Dembele.
Dembele á góðan möguleika á að vinna Ballon d'Or verðlaunin eftirsóttu. Ef PSG tekst að vinna Inter í kvöld er hann kominn í bílstjórasætið um verðlaunin.
Athugasemdir
