Hallgrímur Jónasson.
'Ég er ánægður að strákarnir héldu alltaf áfram og inn fór boltinn sem betur fer'
„Þetta er blendið, við eigum rosalega erfiðan fyrri hálfleik og mér fannst Stjarnan spila frábærlega. Spilið þeirra gekk upp og við vorum alltaf á eftir í allt. Eftir að við fáum dauðafæri í byrjun fannst mér þeir taka yfir, gef þeim það að þeir spiluðu virkilega vel," sagði Hallgrímur Jónasson, þjálfari KA, eftir 1-1 jafntefli gegn Stjörnunni í 10. umferð Bestu deildarinnar í dag.
Stjarnan komst yfir í fyrri hálfleik en KA jafnaði seint í venjulegum leiktíma.
Stjarnan komst yfir í fyrri hálfleik en KA jafnaði seint í venjulegum leiktíma.
Lestu um leikinn: KA 1 - 1 Stjarnan
„Leikurinn breytist svo, þeir fá rautt spjald og eðlilega sitjum við á boltanum. Ég er virkilega ánægður með annan hálfleikinn, liggjum á þeim, eigum 100 fyrirgjafir, skorum mark og eigum örugglega 20 horn (14 í heildina). Við gerum það sem ég vil að við gerum, bara því miður skorum við bara eitt mark. Við vildum fá víti þar sem allir virðast sjá að boltinn fari í hendina á honum."
Undirritaður sagði Hadda frá því að Samúel væri búinn að viðurkenna að boltinn hafi farið í höndina á sér í umræddu atviki. Hvað finnst þér þá um þetta atvik?
„Dómarinn bara sá það ekki, ég er búinn að tala við hann og hann bara útskýrði sitt mál, fannst þetta fara í hausinn á honum og ekkert við því að segja. Það er súrt fyrir okkur en ég hef enga trú á öðru en að dómarnir hafi verið að reyna taka rétta ákvörðun. Ef það er rétt sem þú segir þá því miður var það vitlaus ákvörðun. En ég ætla ekki að spá í því, ætla frekar spá í okkur og hvar við þurfum að bæta okkur. Hrós á liðið mitt fyrir karakter, aftur komum við til baka. Þó að það hefðu átt að vera þrjú stig, þá tökum við þetta eina með okkur."
„Eðlilega hefði ég trú á því (að við myndum klára leikinn) ef við hefðum verið tveimur fleiri. Við gerðum nóg til að vinna leikinn, en það tókst ekki. Þeir vörðust vel í boxinu, markmaðurinn þeirra varði vel, skjótum í slána og niður og eigum að fá víti samkvæmt þér. Ég er bara ánægður með það og tek það með mér í fríið."
„Maður hugsaði á tímabili hvort við myndum ekki ná þessu, það er stór munur á að ná jafntefli eða tapa. Ég er ánægður að strákarnir héldu alltaf áfram og inn fór boltinn sem betur fer."
Sérðu vel atvikið þegar Alex fær rautt spjald?
„Ég sé að hann er að fara og hann fer helvíti grimmt í tæklinguna, ég veit ekki nákvæmlega hvar hann lendir í markmanninum okkar, en þetta var það gróf tækling að maður hugsaði hvort þetta yrði gult eða rautt. Hann dæmdi og gaf honum rautt spjald," sagði Haddi.
Viðtalið í heild má sjá í spilaranum efst.
Athugasemdir
