Björn Daníel Sverrisson.
Björn Daníel Sverrisson, leikmaður FH, reif handboltaskóna fram í kvöld og spilaði með ÍH þegar liðið tapaði naumlega 22-21 gegn Aftureldingu í 1. deild karla í handbolta.
„Bróðir minn er í þessu liði. Ég tók tvær æfingar með þeim í vikunni og langaði að taka einn leik áður en ég fer út. Þetta var drullugaman og það hefði verið þvílíkt sætt að stela stigi af líklega besta liðinu í 1. deildinni," sagði Björn Daníel við Fótbolta.net eftir leikinn í kvöld.
Björn Daníel spilaði á miðjunni hjá ÍH í dag en hann komst ekki á blað.
„Ég var svakalegur á æfingum í vikunni og ég hélt að ég væri alveg með þetta ennþá en það er fáránlegt að spila á móti gaurum sem eru tveir metrar. Ég þarf að spila einn leik á móti lakari andstæðingum og þá næ ég kannski að setja hann."
Björn Daníel var kominn í unglingalandsliðið í handbolta áður en hann lagði harpixið á hilluna 17 ára gamall.
„Það var svo ógeðslega leiðinlegt að æfa handbolta. Þetta var svo mikil taktík og kjaftæði að ég ákvað að fara í fótboltann. Ég held að allir sem að hafa spilað hand og fótbolta og geta eitthvað í fótbolta segja að fótboltinn sé skemmtilegri. Það er gaman að spila handbolta en leiðinlegt að æfa."
Um áramótin mun Björn Daníel ganga í raðir Viking í Noregi en hann segist ekki hafa óttast meiðsli í dag.
„Ég fór varlega í þetta. Mamma og pabbi voru á límingunum í allan daginn og hringdu í mig og sögðu mér að hætta við þetta. Ég fór í contact en passaði mig að snúa ekki ökklana og slíta eitthvað í hnjánum. Ég slapp heill frá þessu og er sáttur," sagði Björn Daníel að lokum.
Hér að ofan má sjá viðtalið við Björn í heild sinni.
Athugasemdir
