Arnar Grétarsson, þjálfari KA, hafnaði því að koma í viðtal við Fótbolta.net eftir tapið gegn FH í undanúrslitum Mjólkurbikarsins í kvöld. Hallgrímur Jónasson aðstoðarþjálfari var því tekinn í viðtal í staðinn.
Lestu um leikinn: FH 2 - 1 KA
„Við spiluðum ekkert frábæran fyrri hálfleik þó við komumst yfir. Við ræddum inn í klefa hvað við vildum gera betur. Mér fannst það ekki takast nægilega vel," segir Hallgrímur.
FH gekk á lagið þegar Bryan Van Den Bogaert fékk sitt annað gula spjald og þar með rautt.
„Þetta var stór ákvörðun og hafði gríðarleg áhrif á leikinn. Hann fær fyrra gula fyrir að hlaupa í átt að dómaranum þegar þeir strauja okkur, að reka hann út af fyrir það og þetta brot finnst mér hart en kannski er hægt að réttlæta það."
KA hefði hinsvegar viljað fá rautt spjald á Jóhann Ægi Arnarsson leikmann FH. Hann var á gulu spjaldi þegar hann fór af vellinum eftir meiðsli. Þá var staðan 1-0 fyrir KA.
„Hann fór svo inn á völlinn án þess að vera búinn að fá leyfi. Þetta er eitthvað sem ég væri til í að yrði skoðað, því það gerði okkur erfitt fyrir að vera manni færri," segir Hallgrímur en Jóhann fékk ekki gult spjald fyrir að koma inn án leyfis. Samkvæmt laganna bókstaf hefði hann átt að fá áminningu og þar með rautt.
„Við erum svekktir en óskum FH til hamingju með að hafa komist áfram. Ég var gríðarlega ánægður með fólkið fyrir norðan sem kom hingað og studdi okkur."
KA tapaði um síðustu helgi gegn Víkingi og nú þessum undanúrslitaleik, er það ekki þungur biti að kyngja?
„Það er það. En það er nóg eftir en við erum ekkert að stressa okkur þó leikir hafi tapast. Við lítum vel út, við erum ánægðir með hvernig liðið er að spila. Ég hef fulla trú á því að við náum okkar markmiðum í deildinni."
Varnarmaðurinn Dusan Brkovic meiddist gegn Víkingi og var ekki með í kvöld. Hallgrímur vonast til að hann verði með gegn Fram á sunnudag.
„Vonandi verður hann með á sunnudag. Hann fékk aðeins í nárann og var tæpur á að vera með í dag. Meiðslastaðan á hópnum er bara frekar góð," segir Hallgrímur.
Athugasemdir
