KA er með montréttinn á Akureyri eftir að hafa unnið 1-0 sigur á Þór í grannaslagnum í Bestu deild karla á VÍS-vellinum í kvöld.

Þórsarar urðu fyrir miklu áfalli snemma leiks er Ganamaðurinn Isaac Atanga virtist ökklabrotna eftir mínútu. Hann hljóp Kára Gautason uppi á kantinum, en missteig sig illa og var fluttur af vellinum á börum og síðar í sjúkrabíl.

Atli Sigurjónsson fékk dauðafæri eftir tuttugu mínútna leik en Steinþór Már Auðunsson varði frábærlega í markinu. Ágúst Eðvald Hlynsson fékk boltann, kom honum inn á hættusvæðið á Atla sem átti hörkuskot en Steinþór sá við honum með löppunum.

Fáeinum mínútum síðar meiddist Rodri, leikmaður KA, eftir baráttu á miðjum velli. Hann fékk högg á hnéð og var utan vallar í smástund áður en hann kom aftur inn á völlinn.

Þórsarar fengu annað færi til að skora en Markús Máni Pétursson bjargaði á línu eftir skalla.

Eftir um það bil hálftíma leik gat Rodri ekki haldið leik áfram eftir að hafa farið í aðra baráttu. Hann var einnig borinn af velli eins og Atanga, en Sveinn Margeir Hauksson kom inn í stað hans.

Hitinn var mikill og nóg af brotum en aðeins eitt gult spjald í fyrri hálfleiknum, það er að segja fyrir utan Sigurð Heiðar Höskuldsson, sem sá gult á hliðarlínunni.

Í þeim síðari fór KA að skapa sér aðeins meira og var Oliver Heiðarsson hættulegur eftir að hafa mistekist að koma sér inn í leikinn í fyrri.

Aron Birkir Stefánsson sá við honum í markinu á 51. mínútu og síðan aftur aðeins nokkrum mínútum síðar.

Ákefðin var mikil í leiknum og hægðist aðeins á leiknum þegar á leið.

Aron Ingi Magnússon fékk hörkufæri til að koma Þór yfir á 79. mínútu en Steinþór Már varði vel. Það var allt í þessum leik nema mörkin eða fram að 86. mínútu.

Bjarni Guðjón Brynjólfsson fór í glórulausa tæklingu á Hallgrím Mar Steingrímssyni í teignum. Hann kom fljúgandi í átt að KA-manninum sem steinlá og vítaspyrna dæmd. Hallgrímur fór sjálfur á punktinn og sendi Aron Birki í vitlaust horn og fagnaði síðan fyrir framan KA-menn.

Stórt atvik og þurfti þetta hreinlega til að fá mark í leikinn, en Þórsarar fengu nokkrar mínútur í uppbótartíma til þess að fá eitthvað úr leiknum, en það dugði ekki.

KA sótti sinn fyrsta sigur á tímabilinu og eru stigin fjögur talsins, en Þórsarar með 6 stig eftir fimm umferðir.