Öskraði á Marcel Brands - Allt á suðupunkti á Goodison Park

Það sýður á stuðningsmönnum Everton en mikil reiði ríkti á Goodison Park í gær þegar liðið tapaði gegn erkifjendunum í Liverpool. Rafa Benítez og lærisveinar eru án sigurs í síðustu sjö deildarleikjum.

Óánægja stuðningsmanna fór ekki framhjá nokkrum manni á vellinum í gær og myndband gengur um samfélagsmiðla þar sem maður sést öskra á Hollendinginn Marcel Brands, yfirmann fótboltamála hjá félaginu.

Hann spyr Brands hvort hann hafi keypt þessa leikmenn sem væru á vellinum.

„Hvað finnst þér um það? Keyptir þú þessa leikmenn?" öskrar maðurinn, segir svo að frammistaðan hafi verið algjör skítur og biður Brands að „fara frá félaginu okkar".

Brands svaraði manninum: „Heldur þú að þetta séu bara leikmennirnir?" - Svar sem margir telja að sé skot á Benítez og/eða stjórnina.