Fanndís: Töpuðum ekki þessum titli í dag
Fanndís Friðriksdóttir.
Mynd: Fótbolti.net - Hafliði Breiðfjörð
Fanndís Friðriksdóttir.
Mynd: Fótbolti.net - Hafliði Breiðfjörð
„Fyrst og fremst er þetta gífurlegt svekkelsi. Ég hélt að við myndum ná að pota inn einu marki hérna í restina. Við töpuðum ekki þessum titli í þessum leik, við gerðum það í Þróttaraleiknum.“ sagði Fanndís Friðriksdóttir, leikmaður Vals, eftir 0-0 jafntefli við Breiðablik í dag sem þýðir að Breiðablik er Íslandsmeistarar og Valur endar tímabilið í 2. sæti deildarinnar.
Hvernig fannst Fanndísi að spila í þessum leik og hvernig fannst henni leikurinn spilast?
„Mér fannst þær ekki skapa sér mikið nema þegar við misstum boltann og við buðum þeim upp í færin. Ekki mikið um opin færi en við áttum margar fyrirgjafir sem við hefðum átt að nýta allaveganna einu sinni.“
Fanndís fékk dauðafæri í blálokin en hún skaut framhjá. Hvernig leið henni eftir það færi?
„Ó já hræðilegt. Ég hitti hann svo vel, en já.“
Fanndís talar um að leikurinn hafi ekki tapast í dag heldur í Þróttaraleiknum sem hún nefndi áður í viðtalinu.
„Þar tapast þetta bara. Við vorum ekki nógu góðar í þeim leik. Ótrúlega svekkjandi.“
Eitthvað jákvætt sem bæði lið geta tekið út úr leiknum er að það var slegið áhorfendamet í dag en alls mættu 1625 á Valur - Breiðablik.
„Frábært. Þetta var skemmtilegur leikur að spila. Ótrúlega gaman að sjá svona marga mæta. Vonandi er þetta það sem koma skal í framtíðinni í kvennafótboltanum.“
Nánar er rætt við Fanndísi í spilaranum hér að ofan.
