Ten Hag um meinta óánægju: Viss um að leikmenn standa með mér

Ten Hag var spurður að því hvort leikmenn stæðu við bakið á honum?

„Já, ér viss um það. Það er hægt að horfa á endurkomuna gegn Brentford, leikina gegn Burnley og Fulham. Liðsheildin er til staðar. Við höfum sýnt karakter og vilja, við stöndum saman. Það er ekki hægt að spila eins góðan fótbolta og við höfum gert nýlega án þess að hafa samheldni."

Ten Hag segist alltaf hlusta á skoðanir leikmanna sinna og gefi þeim tækifæri á að ræða hlutina. Leikmenn liðsins vilji spila þann leikstíl sem liðið spilar.

Ekki rétt vinnubrögð
Fjórir fjölmiðlar hafa verið settir í bann hjá Manchester United og mega ekki mæta á fréttamannafundi félagsins.

„Þeir hefðu átt að hafa samband við okkur að fyrra bragði, ekki fara á bak við okkur og prenta út greinar. Það eru ekki rétt vinnubrögð. Við eigum í góðu sambandi við þessa fjölmiðla og erum að ræða við þá," segir Ten Hag.

Við erum ekki vélmenni
Manchester United fékk mikla gagnrýni eftir 1-0 tap gegn Newcastle síðasta laugardag.

„Við áttum viku með tveimur góðum frammistöðum og einni slæmri. Liðið er á leið í rétta átt. Það spilaði mjög góðan fótbolta og skoraði góð mörk gegn Galatasaray og Everton en gegn Newcastle spiluðum viið ekki vel," segir Ten Hag.

„Við erum meðvitaðir um það, við erum ekki ánægðir með frammistöðuna en vorum inni í leiknum og hefðum getað fengið stig með aðeins meiri ákveðni. Við erum ekki vélmenni, ef lið spilar þrjá erfiða leiki á sex dögum getur komið upp þreyta. Maður notar það alls ekki sem afsökun en það er staðreynd."