Sóknartengiliðurinn Cole Palmer hefur ekki átt gott tímabil með Chelsea og er sæti hans í enska landsliðshópnum í bráðri hættu fyrir HM í Norður-Ameríku.
Á sama tíma fyrir ári síðan var Palmer einn af fyrstu mönnum á blað í byrjunarliði Englands en staðan er allt önnur í dag. Á meðan Palmer hefur ekki verið að standa sig eru ýmsir keppinautar hans um sæti í landsliðshópnum að gera frábæra hluti.
Nafnarnir Morgan Rogers og Morgan Gibbs-White hafa verið að gera frábæra hluti og þá er talið öruggt að Jude Bellingham verði með í HM-hópnum. Eberechi Eze og Phil Foden, leikmenn Arsenal og Manchester City, gera einnig tilkall til sætis í hópnum.
Samkeppnin fyrir Palmer er mikil þar sem ekki er talið líklegt að Thomas Tuchel þjálfari taki meira heldur en þrjá eða fjóra af sex fyrrnefndum leikmönnum með sér til Bandaríkjanna.
