Fram tapaði 3-0 gegn Þrótti á heimavelli í dag og var fyrirliðinn Hildur María Jónasdóttir eðlilega svekkt eftir leik.
„Auðvitað mikil vonbrigði, við ætluðum auðvitað að sækja okkar fyrstu stig. Það tókst ekki þannig að fyrstu tilfinningarnar bara mikil vonbrigði.“
Lestu um leikinn: Fram 0 - 3 Þróttur R.
„Mér fannst við spila vel en það kemur eitt klaufalegt mark þarna í fyrri hálfleik og svo komum við sterkari út í seinni hálfleik og erum svona með momentið með okkur. Það fellur bara ekki með okkur í dag, þetta var svolítið bara stöngin út.“
„Ég klúðra dauðafæri og svona, þannig þetta er bara stöngin út en það er bara næsti leikur.“
Framliðið kom af krafti inn í seinni hálfleik og segir Hildur skilaboðin hafa verið skýr í hálfleik.
„Bara ekki gefast upp og halda áfram. Við höfðum engu að tapa þegar við förum út í seinni hálfleik. Við eigum helling eftir að sanna okkur.“
„Það var komið með mikinn kraft út en það var svona högg þegar það gengur ekki upp og færð á þig annað mark.“
Að hennar mati einkennist liðið af sterkri trú og baráttu.
„Já ég myndi segja það, mér finnst í öllum þessum leikjum, þó við séum ekki búin að sækja stig, að þá er stígandi í þessu og ég er stolt af liðinu fyrir að halda alltaf áfram.“
„Við höfum alltaf trú og það er alltaf tími, það getur allt gerst.“
„Þetta tímabil er bara rétt að byrja og við munum halda áfram að berjast. Það er nóg af stigum eftir í pottinum og við munum bara halda áfram.“
Sjáðu viðtalið í heild í spilaranum hér að ofan.
