Ísabella Sara Tryggvadóttir spilaði með Rosengård sem tapaði fyrir portúgalska liðinu Sporting, 3-0, í fyrri leik liðanna í forkeppni Evrópubikarsins í kvöld.
Hlutverk Ísabellu hjá Rosengård hefur breyst frá síðustu leiktíð og spilar hún nokkuð stóra rullu í liðinu í dag.
Hún byrjaði inn á gegn Sporting í kvöld, en var tekin af velli í stöðunni 2-0 fyrir Sporting.
Portúgalska liðið bætti við þriðja markinu í uppbótartíma og þarf Rosengård nú kraftaverk til að komast áfram í 16-liða úrslit keppninnar.
Liðin mætast aftur á miðvikudaginn í næstu viku.
Sænsku meistararnir hafa átt erfitt uppdráttar á tímabilinu og berjast nú á hinum enda töflunnar. Það er með 18 stig í 12. sæti þegar fimm leikir eru eftir og möguleiki á falli raunverulegur og rúmlega það en liðið hefur ekki unnið deildarleik síðan um miðjan júní.
Athugasemdir
