Mendy verður klár í kringum mánaðarmótin
Pep Guardiola hélt fréttamannafund í dag og var spurður hvort það væri rétt að hann hafi sagt staðarhaldaranum á Etihad að leyfa grasinu að vaxa meira en vanalega fyrir leik Manchester City gegn Liverpool.
Orðrómur þess efnis fór á kreik eftir 2-1 sigur Man City, þar sem grasið á Etihad virtist vera lengra en vanalega á myndum.
Lee Jackson er staðarhaldarinn á Etihad og segir hann þetta vera falsfréttir. Pep er á sama máli.
„Ég er ekki staðarhaldarinn hérna. Ég átti ekkert samtal við neinn um grasið á vellinum. Liverpool spilar snöggan fótbolta en við viljum spila enn sneggri bolta," sagði Pep.
Pep var svo spurður út í meiðsli bakvarðarins Benjamin Mendy sem hefur verið mikið frá keppni frá komu sinni til Man City.
„Mendy er byrjaður að æfa einn. Það eru kannski tvær eða þrjár vikur í að hann sé klár."
Þá var stjórinn einnig spurður út í sölu ungstirnisins Brahim Diaz til Real Madrid.
„Við gerðum allt í okkar valdi til að halda Brahim hjá félaginu, alveg eins og með Jadon (Sancho) og Phil (Foden). Vonandi fær hann spilatíma hjá sínu nýja félagi, hann er góður strákur."
Athugasemdir