„Hann var bara mjög sveiflukenndur,'' sagði Þorlákur Árnason, þjálfari ÍBV, aðspurður um leik KA og ÍBV í Bestu-deild karla í dag. Þar fóru KA með 1-0 sigur af hólmi í fjörugum leik þar sem að mörkin hefðu getað verið talsvert fleiri.
„Fannst KA betri fyrsta hálftímann og það var bara ekkert fyrr en eftir 30 mínútur sem að mér fannst við líkir sjálfum okkur. Leikurinn var bara jafn í rauninni eftir það, þeir sterkari fyrstu 30 og svo bara jafnt. Maður hélt að þetta væri að sigla í jafntefli þegar að þeir skora.''
Lestu um leikinn: KA 1 - 0 ÍBV
Eins og áður sagði fór aragrúi af færum í súginn og í raun ótrúlegt að einungis eitt mark hafi verið skorað í leiknum og það í blálokin. Þorlákur tók undir það.
„Já, engin spurning. Báðir markmennirnir áttu mjög góðan leik og fannst svona eins og Hjörvar væri að fara að vinna stigið fyrir okkur, en svo kom bara Stubbur með þrjár góðar markvörslur einn á móti einum. Þetta var ekki 0-0 leikur, því miður,'' sagði Þorlákur brosandi.
Hjörvar Daði Arnarsson kom inn í byrjunarlið ÍBV vegna leikbanns Marcel Zapytowski og nýtti tækifærið frábærlega. Þorlákur hrósaði Hjörvari fyrir frammistöðuna.
„Hann stóð sig bara gríðarlega vel og bara eins og við vitum. Hann hefur tekið bikarleikina hjá okkur og staðið sig bara gríðarlega vel í sumar. Við erum með tvo mjög góða markmenn, við vissum það.''
Viðtalið má sjá í heild sinni í spilaranum hér að ofan.
