„Það er ekkert sjálfgefið í þessu. Við vorum að vinna eitt sterkasta liðið í Tallinn. Það var fúlt að fá þetta mark á sig og það getur skipt sköpum á fimmtudaginn en við höfum áhrif á það að lokum,“ segir Rúnar Páll Sigmundsson eftir 2-1 sigur Stjörnunnar á Levadia Tallinn á Samsung-vellinum í Garðabæ.
Lestu um leikinn: Stjarnan 2 - 1 Levadia
Leikurinn var fyrri leikur liðanna í fyrstu umferð Evrópudeildarinnar en sá síðari fer fram næsta fimmtudag ytra. Rúnar var sáttur með frammistöðuna en liðið fékk nokkur færi til að bæta við mörkum í leiknum. Meðal annars brenndi Hilmdar Árni Halldórsson af vítaspyrnu. Hvítrússenskur dómari leiksins náði hins vegar að ergja heimamenn.
„Hann fór mjög í taugarnar á okkur. Hann leyfði mikið, dæmdi brot á okkur fyrir eitthvað sem var ekki dæmt á þá og missti svolítið tökin. Sennilega var hann að gera sitt besta. Síðan tala þeir enga ensku svo það er ekkert hægt að tjá sig við þá. Kannski var það bara ágætt,“ segir Rúnar.
Framundan er flug til Eistlands á mánudag. „Strákarnir eru búnir að þreifa á þeim í 90 mínútur. Nú vitum við hverju við erum að fara að mæta. Þekkjum þá vel og aðstæðurnar. Það verður ágætis hiti en við verðum á sama hóteli og öll umgjörnin sú sama,“ segir Rúnar.
