Omar Sowe verður áfram í Leikni út tímabilið

Sowe, sem er 23 ára gamall, hefur skorað 10 mörk í 15 leikjum í Lengjudeildinni í sumar.

Framherjinn var eftirsóttur af félögum úr Bestu deildinni en samkvæmt heimildum Fótbolta.net hafnaði Omar því að ganga í raðir Fylkis. ÍA hafði einnig áhuga, en Omar hefur ákveðið að klára tímabilið með Leikni.

Omar hefur skorað 22 mörk í 36 deildarleikjum með Leikni á tveimur tímabilum sínum hjá félaginu eða síðan hann kom frá Breiðabliki. Sumarið 2022 skoraði hann 2 mörk í 16 leikjum með Blikum, en var þó mest megnis í aukahlutverki.

Samningur Omars rennur út eftir þetta tímabil og mun hann þá skoða framtíð sína.

Leiknir er í 10. sæti Lengjudeildarinnar með 16 stig og í harðri baráttu um að halda sæti sínu í deildinni.