Willum Þór Þórsson, þjálfari KR var ánægður með með sigur sinna manna gegn Breiðablik í kvöld.
Lestu um leikinn: Breiðablik 1 - 3 KR
„Þetta var fjörugur og kröftugur leikur. Við byrjuðum mjög vel. Við vorum staðráðnir í því að svara mjög vondum leik síðast. Svo er auðvitað hitt, okkur langar í Evrópusætið og við erum ekki tilbúnir til þess að gefa það frá okkur og til þess verðum við að vinna rest," sagði Willum.
KR komst í 2-0 en Breiðablik minnkaði muninn snemma í seinni hálfleik. Willum fór þó ekki yfir um við það.
„Liðin í deildinni, eins og taflan sýnir eru mjög jöfn. Blikar eru hörkulið og vel spilandi lið. Við vorum búnir að vinna í því að brjóta upp þeirra spil. Auðvitað vex þeim ásmeginn við það að horfa bara á eitt mark til þess að jafna leikinn. Auðvitað líður manni ekkert rosalega vel, en þó betur en oft áður."
Sveinn Aron Guðjohnsen sparkaði Óskar Örn Hauksson hressilega niður og vakti það upp reið viðbrögð KR-inga.
„Þetta er bara svona spark aftan í sem vekur viðbrögð. Menn eru í þessu af ástríðu."
Sonur Willums, Willum Þór Willumsson var í byrjunarliði Breiðabliks í kvöld og var þetta því slagur feðga.
„Tilfinningin var ekki góð. Mér fannst þetta vond tilfinning. Fótbolti er mikill hluti af okkar heimilislífi og öll börnin í fótbolta. Mér finnst gaman að spjalla um hlutina og spyrja hvernig gengur. Það var þegjandi samkomulag fyrir þennan leik og það voru engar spurningar og ekkert rætt. Svo auðvitað langar mig að honum gangi sem best."
Willum fór í viðtal við Akraborgina nú á dögunum þar sem hann sagði að það væri ekki alvont að vera í 4. sæti. Vakti það upp mikil viðbrögð stuðningsmanna KR.
„Það er þannig með orðin. Maður þarf að vanda sig. Það verður aldrei ásættanlegt í Vesturbænum. Það var ekki þannig þegar ég var að spila, ekki þegar ég þjálfaði þá síðast, það var ekki þegar ég var að alast upp. Það verður aldrei ásættanlegt og ég geri mér fyllilega grein fyrir því.
