Sandra: Gaman að sjá hvað það er mikill hugur í svona ungu og efnilegu liði
Sandra María Jessen kom að öllum mörkum liðsins í dag
Mynd: Fótbolti.net - Hafliði Breiðfjörð
Sandra María Jessen kom að öllum mörkum liðsins í dag
Mynd: Fótbolti.net - Hafliði Breiðfjörð
„Fyrir leikinn hefði maður alltaf sætt sig við eitt stig gegn sterku liði ÍBV," sagði Sandra María Jessen sem átti stórleik fyrir Þór/KA í 3-3 jafntefli liðsins gegn ÍBV í Bestu deild kvenna.
„Eftir að hafa komið þrisvar til baka langaði manni auðvitað í fleiri stig. Sérstaklega þar sem við skorum fjórða markið en það var tekið af."
Þór/KA hengdi ekki haus eftir að markið var dæmt af og skoruðu löglegt mark strax í næstu sókn.
„Það er rosalega mikill hugur og karakter í þessu liði. Þetta gaf okkur smá búst og við sáum að þetta væri hægt og trúðum enn meira á það að við gætum jafnað. Það er gaman að sjá hvað það er mikill hugur í svona ungu og efnilegu liði," sagði Sandra.
Þór/KA vildi hefna fyrir 5-4 tap í Eyjum í fyrri umferðinni.
„Það var mjög mikil særindi eftir fyrri leikinn þannig við vildum extra mikið vinna í dag. Það var klárlega upplagið að ná í þrjú stig í leiknum. Við börðumst og settum effort í leikinn og það skilaði okkur stigi og við tökum því," sagði Sandra.
