Sveinn Aron Guðjohnsen, leikmaður U21 árs landsliðs Íslands, ræddi við Fótbolta.net eftir 3-0 tapið gegn Ítalíu í undankeppni EM í kvöld.

Lestu um leikinn: Ítalía 3 -  0 Ísland U21

Sveinn Aron var í byrjunarliðinu gegn Ítalíu en Riccardo Sottil gerði mark á 33. mínútu áður en Patrick Cutrone skoraði tvö undir lokin.

Íslenska liðið átti fínan leik og skapaði nokkur góð marktækifæri en boltinn vildi ekki inn.

„Við vorum svolítið óheppnir í fyrri hálfleik og náðum ekki að skora og hefðum við skorað í fyrri hálfleik þá hefði þetta farið öðruvísi," sagði Sveinn við Ívan Guðjón Baldursson á Fótbolta.net.

„Við náðum tveimur góðum í fyrri hálfleik og einni góðri í seinni en þeir náðu að loka aðeins betur á þetta í seinni hálfleik."

„Þetta var skemmtilegt þangað til við vorum 1-0 undir þá var þetta ekki jafn skemmtilegt."

Það sauð upp úr undir lok leiks er Jón Dagur Þorsteinsson þrumaði boltanum í leikmann ítalska liðsins og fékk Eiður Smári Guðjohnsen, aðstoðarþjálfari landsliðsins, rautt spjald en Sveinn segir að það hafi verið kominn smá pirringur í liðið.

„Það var smá pirringur í okkur. Ég veit ekki alveg hvað það var en það er eins og það er, smá pirringur," sagði hann í lokin.

Tweet

Senda a Facebook Hafdu samband Senda frétt Prenta frétt Frétta leit