'Mér fannst við falla á prófinu, vorum ekki nægilega stórir til að klára þetta próf'
Davíð Helgi Aronsson er unglingalandsliðsmaður sem er á láni frá Víkingi.
Njarðvík er í þriðja sæti eftir leikinn.
„Það sem ég tek út úr þessu er að við féllum á prófinu, fannst við vera pinkulitlir í okkur, ólíkir sjálfum okkur. Og þessi tvö mörk í fyrri hálfleik, þetta eru náttúrulega algjörar gjafir, Aron (Snær Friðriksson) á að verja þetta fyrsta og myndi gera það í 9 af 10 skiptum Svo er þetta mark sem Rafa fær í vöggugjöf, það er eitthvað rannsóknarefni. Ég er að spila með ungan hafsent sem lærir helling eftir þetta atvik," sagði Gunnar Heiðar Þorvaldsson, þjálfari Njarðvíkur, eftir tap gegn Þór í Lengjudeildinni.
Lestu um leikinn: Þór 3 - 1 Njarðvík
„Það er erfitt að fara með 2-0 stöðu í hálfleik, en mér fannst við koma fínt út, gerum virkilega vel, búum til góð færi og Aron (Birkir Stefánsson) ver náttúrulega stórkostlega strax í byrjun seinni. Ef við hefðum skorað þar, þá hefði þetta verið allt önnur staða. Mér fannst við falla á prófinu, vorum ekki nægilega stórir til að klára þetta próf."
Davíð Helgi Aronsson, ungur varnarmaður Njarðvíkinga, settist á grasið í aðdraganda annars marksins. Hann var ekki standandi þegar Þórsarar komust í gegn og tvöfölduðu forskot sitt.
„Leikurinn er í gangi á þessu augnabliki, hann er að drepast í hendinni og þú sem leikmaður þarft bara að þrauka, halda áfram þangað til að boltinn fer út af, og þá getur þú beðið um aðstoð. Þetta er ekki eins og í handbolta, (þar sem þú) getur dottið strax niður og þá er flautað. Það er eitthvað sem hann þarf að læra og kannski fleiri sem kunna ekki þessa reglu. Þetta sýnir að þú þarft að vera með pung í svona leiki, klókur, og mér fannst Þórsararnir ofan á þar."
„Við höfum verið mjög klínískir í sumar, höfum verið að ná góðum mörkum á góðum mómentum. Mörk breyta leikjum. Ef við hefðum náð þessu 2-1 markinu þá hefði þetta orðið allt, allt annar leikur."
Tvö töp í röð staðreynd hjá Njarðvík, er sjálfstraustið aðeins brotið?
„Það er erfitt að segja, við tókum 17 leiki án þess að tapa leik. Auðvitað var það frábært, en við hefðum átt að ná fleiri sigrum. Svo tapar þú leik, þá viltu spila sem fyrsta aftur til að lagfæra það sem fór úrskeiðis. Við fengum alvöru próf hérna, ekki auðvelt að koma hingað, en við féllum á prófinu, vorum ekki nægilega stórir."
Þórsarar mættu virkilega vel stemmdir til leiks og með mjög öflugan stuðning úr stúkunni.
„Það kom ekki á óvart hvernig þeir mættu til leiks, það sást á stemningunni fyrir leik hérna fyrir utan. Frábært hrós á Þórsarana, umgjörðina og stemninguna. Eins og ég sagði við leikmennina þá eru þetta leikirnir sem þú vilt spila; ástæðan fyrir því að þú ert að hlaupa í snjó á löngu undirbúningstímabili," segir Gunnar.
Athugasemdir
