Rúnar Páll.
„Þetta var frekar rólegur leikur, rólegt tempó í honum. Ágætisleikur, fínt að vinna þennan leik, eykur sjálfstraustið okkar. Þetta var fínt.“ sagði Rúnar Páll Sigmundsson, þjálfari Gróttu, eftir 2-1 sigur á Dalvík/Reyni í Fótbolti.net bikarnum í kvöld.
Lestu um leikinn: Grótta 2 - 1 Dalvík/Reynir
Hvernig líður Rúnari í Gróttu?
„Mér líður mjög vel hérna á Nesinu. Mjög skemmtilegir strákar, skemmtilegt lið og ágætis umgjörð í kringum okkur. Mér líður bara vel. Þetta er betri deild en ég hélt. Bara búið að vera bráðskemmtilegir leikir. Gaman að kynnast landinu og fara út um allt að spila.“
Það var mikil leikmannavelta í Gróttu fyrir mót og sömuleiðis þjálfarabreytingar, hvernig hefur það gengið fyrir Rúnar og Gróttu að aðlagast þeim breytingum?
„Við höfum náð að púsla saman og fengið unga og efnilega stráka til okkar að búa til nýtt lið. Það finnst mér hafa gengið ágætlega. Tekur bara tíma. Bara glænýtt Gróttulið og ég er bjartsýnn á framhaldið. Spila skemmtilegan fótbolta og njóta þess að vera saman í þessu.“
Næsti leikur Gróttu er heimaleikur gegn Haukum en hver eru markmið sumarsins á Nesinu?
„Markmiðið er að reyna að gera eins vel og hægt er og fara upp um deild. Það er markmiðið hjá mörgum liðum held ég í þessari deild. Síðan bara sjáum við hvernig það gengur í lok móts.“ sagði Rúnar Páll að lokum.
Viðtalið við Rúnar má sjá í heild sinni í spilaranum hér að ofan.
Athugasemdir
