Afturelding laut í lægra haldi 1-0 gegn ÍA í dag og eru þar með fallnir úr deild þeirra bestu í bili. Liðið þurfti að sigra ÍA og treysta á að Vestri og KR gerðu jafntefli fyrir vestan en allt kom fyrir ekki og fall er staðreynd í dag.
Aðspurður um fyrstu viðbrögð eftir leikinn svaraði Magnús Már Einarsson þjálfari Aftureldingar
„Svekkjandi, Mjög svekkjandi að fá ekki neitt út úr þessum leik í dag og svekkjandi að falla að sjálfsögðu en ég kýs að líta á glasið hálffullt og horfa frekar á það sem við höfum gert vel í sumar. Við höfum gert að mörgu leyti mjög vel miðað við að spila í fyrsta skiptið í efstu deild og erum með stig sem yfirleitt hefur dugað til að halda sér uppi. Náðum í stig af 10/11 liðum í 22 leikja mótinu, unnum Íslandsmeistarana og gerðum margt í sumar sem við gerðum vel en það sem drepur á endanum eru alltof mörg jafntefli.“
Lestu um leikinn: ÍA 1 - 0 Afturelding
„Við erum inn í eiginlega öllum leikjum í sumar, fáir leikir sem við eigum ekki break í ef einhverjir þannig það sýnir okkur að við eigum að mínu mati heima í þessari deild en við þurfum að gera meira til að festa okkur í sessi, við gáfum allt í þetta en því miður þá var þetta niðurstaðan núna og við þurfum að taka eitt skref til baka og svo tvö fram á við.“
„Gerðum bara of mikið af jafnteflum og langur kafli þar sem við vorum ekki að vinna leiki, það fer í reynslubankann hjá mér sem þjálfari og reynslubankann hjá strákunum. Flestir að spila sitt fyrsta ár í Bestu deildinni þannig það er engin spurning við þurfum að læra af því.“
„Við þurfum að gera meira til að festa okkur í sessi og það er bara framtíðar markmið og þetta er ekki endirinn í dag, við þurfum að spýta í lófana, gefa í og ná að festa okkur í sessi í Bestu deildinni í framtíðinni“
Vangaveltur hafa verið með framtíð Magnúsar með liðið hvernig horfir hann á það?
„Við ákváðum að spjalla ekkert um það fyrr en að seasonið væri lokið, einbeitingin var bara á að vinna hérna í dag og vinna leikinn síðustu helgi, þannig ég hef bara í alvöru ekki hugsað mikið út í það en mögulega fer maður að gera það þegar seasonið er búið. Ég er opinn fyrir því að halda áfram því að mér finnst þetta verkefni ekki vera lokið. Það er mikið potential í Mosfellsbæ að gera ennþá betur og vona að Afturelding haldi sama hóp, þannig að við getum gert atlögu að því að koma á næsta ári og allir reynslunni ríkari. Ég vona að Afturelding fari upp aftur á næsta ári og ég er opinn fyrir því að halda áfram líka en við eigum eftir að fara út í þær viðræður og sjá hvort við séum ekki sammála því að spýta þá meira í og gera þá atlögu að því að festa liðið í sessi í Bestu deildinni.“
Margir leikmenn Aftureldingar hafa sprungið út í sumar, m.a. Hrannar er eitthvað vitað með hans framtíð hjá félaginu, mun hann vera áfram eða fara?
„Það kemur bara í ljós, hann hefur staðið sig frábærlega og verðskuldað, búinn að leggja mikið á sig og æfa vel og gera réttu hlutina, þess vegna er hann búinn að standa sig svona vel eins og margir aðrir í liðinu. Við höfnuðum tilboði í hann í júlí og við þurfum bara að sjá hvort það komi tilboð í hann eftir tímabilið eða hvernig það verður og það verður bara að koma í ljós. Hann gerði nýjan samning í vor þannig við þurfum bara að sjá hvað verður í vetur með það.“
Viðtalið í heild má sjá í spilaranum hér að ofan
