Karólína Lea skoraði tvö fyrstu mörk Blika í leiknum, hennar fyrstu deildarmörk í sumar
„Leikurinn var mjög góður af okkar hálfu. Við náðum að klára þetta í fyrri hálfleik þannig að við gátum verið að skipta mikið og spilað okkar leik,“ sagði Karólína Lea Vilhjálmsdóttir, leikmaður Breiðabliks, eftir sjöunda sigurleik liðsins í röð í Pepsi Max-deildinni.
Lestu um leikinn: Fylkir 0 - 4 Breiðablik
„Við ætluðum að nota kantana. Við erum náttúrulega með rosalegan sprengikraft á köntunum. Við vildum fá fyrirgjafir, fara Blikaleiðina,“ sagði Karólína um upplegg Breiðabliks í leiknum en sjálf komst hún á blað með tveimur fyrstu mörkum leiksins. Þetta voru jafnframt hennar fyrstu mörk í sumar en Þorsteinn Halldórsson, þjálfari, hafði talað um það í viðtali um daginn að hann vildi að markaskorun liðsins dreifðist meira.
„Hann var eitthvað að skjóta á mig í gær og segja að ég væri ekki búin að skora nóg svo ég bara sokkaði hann smá,“ sagði Karólína létt en bæði mörk hennar skoraði hún með hnitmiðuðu skoti úr teignum.
„Þau (mörkin) voru eiginlega alveg eins. Ég gerði mitt þarna fyrir utan teiginn og það var kærkomið að skora loksins.“
Hægt er að horfa á allt viðtalið við Karólínu Leu í spilaranum hér að ofan.
Athugasemdir
