England í dag - Erfiðir leikir fyrir Arsenal og Liverpool

Arsenal er án sigurs síðustu þrjá leiki í röð og þarf á sigri að halda í titilbaráttunni. Nýliðar Leeds hafa verið á góðu skriði og eru aðeins búnir að tapa einum leik síðan í byrjun desember. Þetta verður því erfiður útileikur fyrir Arsenal.

Á sama tíma spilar Brighton við Everton á meðan botnlið Wolves fær Bournemouth í heimsókn.

Chelsea mætir svo West Ham í Lundúnaslag og eru bæði lið búin að vinna síðustu tvo deildarleiki í röð.

Englandsmeistarar Liverpool taka á móti deildabikarmeisturum Newcastle í lokaleik dagsins. Leikir liðanna í fyrra voru gríðarlega spennandi þar sem Newcastle hafði betur í úrslitaleik deildabikarsins áður en Liverpool vann úrvalsdeildarleik á St. James' Park í ágúst með dramatísku sigurmarki frá táningnum Rio Ngumoha á 100. mínútu.

Það má búast við mikilli skemmtun í dag og í kvöld þegar leikmenn stíga til vallar í bestu deild í heimi.

Leikir dagsins
15:00 Brighton - Everton
15:00 Wolves - Bournemouth
15:00 Leeds - Arsenal
17:30 Chelsea - West Ham
20:00 Liverpool - Newcastle