Þýskaland: Ísak og félagar í betri stöðu eftir sigur

Ísak Bergmann Jóhannesson fékk að spila síðustu 25 mínúturnar þegar Köln vann gríðarlega mikilvægan leik gegn Wolfsburg í efstu deild þýska boltans í kvöld.

Linton Maina skoraði eina mark leiksins eftir laglegt einstaklingsframtak á 29. mínútu. Hann fékk boltann úti á hægri kanti og náði að færa sig nær vítateigsboganum áður en hann hleypti af skoti með marga varnarmenn fyrir framan sig.

Skotið var hnitmiðað þar sem hann náði að setja boltann í gegnum klofið á síðasta varnarmanninum og því var markvörðurinn lengi að skutla sér.

Köln var betra liðið í tíðindalitlum fyrri hálfleik en gestirnir frá Wolfsburg urðu hættulegri aðilinn eftir leikhlé. Það var þó lítið um færi í lokuðum leik.

Ísak kom inn af bekknum á 67. mínútu og hjálpaði liðinu að halda forystunni til leiksloka og tryggja dýrmæt stig.

Köln er í tíunda sæti eftir þennan sigur, með 23 stig eftir 20 umferðir. Fjórum stigum fyrir ofan Wolfsburg.