Argentínumaðurinn Alexis Mac Allister var besti maður Liverpool í stórkostlegri frammistöðu liðsins í 6-0 sigrinum á Qarabag í lokaumferðinni í deildarkeppni Meistaradeildar Evrópu í gær.
Mac Allister skoraði tvö mörk fyrir Liverpool í leiknum og var valinn maður leiksins af Sky Sports.
„Við sleppum við umspilsleikina sem er ótrúlega mikilvægt á svona löngu tímabili eins og þessu. Við vorum of opnir í fyrri hálfleiknum en mun betri í þeim síðari og náðum í mörkin," sagði Mac Allister.
Hann fékk gullið tækifæri til þess að skora fyrstu þrennuna á ferlinum eftir fyrirgjöf Salah en brást bogalistin.
„Mér fannst við gera vel. Ég er hrifinn af því að koma mér í teiginn og kannski segja sumir að ég sé ekki það góður þegar ég mæti þangað. Ég er enn reiður út í sjálfan mig því þetta var ótrúlega góð fyrirgjöf frá Mo og góður möguleiki fyrir mig til að skora fyrstu þrennuna á ferlinum."
„Við vitum að við höfum verið betri í Meistaradeildinni en í úrvalsdeildinni. Við þurfum samt að horfa í það jákvæða, en fyrst og fremst hugsa um næsta leik," sagði Mac Allister.
Athugasemdir
