Lazio og Genoa áttust við í fyrsta leik helgarinnar í efstu deild ítalska boltans og var fyrri hálfleikurinn tíðindalítill. Mikael Egill Ellertsson byrjaði á miðjunni hjá Genoa og lék allan leikinn.

Staðan var markalaus í leikhlé en hinn 38 ára gamli Pedro náði forystunni fyrir heimamenn með marki úr vítaspyrnu á 56. mínútu eftir að dæmd hafði verið hendi á varnarmann Genoa.

Dómarinn dæmdi upprunalega hornspyrnu en breytti ákvörðun sinni eftir að hafa verið sendur í skjáinn. Varnarmaður Genoa gat ekkert gert til að færa höndina frá en hún var ekki uppvið líkamann og því vítaspyrna dæmd.

Kenneth Taylor, sem var keyptur til Lazio fyrr í janúar, skoraði sitt fyrsta mark fyrir félagið skömmu síðar til að tvöfalda forystuna. Aftur var Isaksen aðalmaðurinn þar sem hann nýtti sér slæm mistök í vörn Genoa til að komast innfyrir áður en hann lagði boltann út í teiginn á Taylor, sem var einn á auðum sjó og gerði vel að klára með marki.

Gestirnir frá Genúa vöknuðu heldur betur til lífsins eftir þetta og náðu að jafna muninn. Fyrst skoraði Ruslan Malinovskyi af vítapunktinum eftir að hendi var dæmd innan vítateigs og aftur var dómarinn sendur í skjáinn til að breyta dómi sínum eftir að hafa misst af atvikinu í rauntíma. Síðan jafnaði Vitinha metin af stuttu færi þegar boltinn datt fyrir lappir hans eftir stórsókn gestanna.

Staðan hélst 2-2 allt þar til seint í uppbótartímanum. Leikurinn virtist stefna í sanngjarnt jafntefli þegar enn einn vítaspyrnudómurinn leit dagsins ljós. Luca Zufferli dómari var sendur í skjáinn í þriðja sinn og aftur reyndist hann sammála kollegum sínum í VAR-herberginu. Vítaspyrna dæmd og skoraði Danilo Cataldi af punktinum.

Lokatölur 3-2 og er Lazio í áttunda sæti með 32 stig eftir 23 umferðir. Genoa er með 23 stig, sex stigum fyrir ofan fallsvæðið.

Smelltu hér til að kaupa áskrift að Livey