Sara Björk Gunnarsdóttir, landsliðsfyrirliði, sat fyrir á Teams-blaðamannafundi í Ungverjalandi eftir að ljóst varð að Ísland verður á meðal þáttökuþjóða á EM næsta sumar.
Ísland fer beint á mótið sem eitt af þremur liðum með bestan árangur í öðru sæti í undanriðlunum.
„Þetta er geggjuð tilfinning. Þessi undankeppni er búin að taka sinn tíma. Það hefði verið skemmtilegt að fagna beint eftir leikinn í dag, en við þurftum að bíða í nokkra tíma," sagði Sara en mikil fagnaðarlæti heyrðust á bak við hana.
„Það var smá stress í gangi, en það er geðveik tilfinning að vera búin að tryggja sig á EM."
Mótið fer fram sumarið 2022 en þetta er fjórða Evrópumótið í röð sem Ísland fer á.
„Þetta er löng bið, en þetta eru bara kringumstæðurnar. Við erum búnar að tryggja okkur þrisvar áður og í þetta skiptið viljum virkilega ná einhverju almennilegu markmiði og gera eitthvað á EM."
Á EM 2017 tapaði Ísland öllum leikjum sínum og féll úr leik í riðlakeppninni. Er liðið betur undirbúið fyrir stórmót núna en þá?
„Við erum búnar að vera með ótrúlega sterkan hóp í þessari undankeppni. Við vorum vel undirbúin fyrir 2017, en við áttum ekki gott mót. Við náðum ekki að sýna hvað í okkur bjó - núna er tækifæri til þess. Það eru sterkir leikmenn búnir að koma inn í hópinn. Það er langur undirbúningur framundan."
Athugasemdir