Davie Selke (t.h.)

Mynd: EPA

Köln vann sinn fyrsta útileik í þýsku deildinni í kvöld þegar liðið mætti Darmstadt.

Köln hefur skorað fæst mörk í deildinni en Darmstadt hefur fengið á sig flest. Fyrir leikinn var Köln í næst neðsta sæti og Darmstadt í sætinu fyrir ofan sem er umspilssæti um áframhaldandi veru í deildinni.

Köln fékk hornspyrnu eftir klukkutíma leik og boltinn barst yfir á fjærstöngina þar sem Davie Selke var mættur og setti boltann í netið.

Það reyndist eina mark leiksins og því sterkur sigur Köln staðreynd. Liðið fór upp fyrir Darmstadt með þessum sigri en liðin eru jöfn að stigum.