Ísland tók á móti Slóvakíu á Laugardalsvelli í kvöld í undankeppni EM og sigruðu stelpurnar okkar 1:0 með marki frá Elínu Mettu eftir um klukkutíma leik. Ingibjörg Sigurðardóttir var kát eftir leik:
Lestu um leikinn: Ísland 1 - 0 Slóvakía
"Mikill þolinmæðisleikur og við þurftum virkilega að sýna okkar bestu hliðar í uppspilinu og vera þolinmóðar en það skilaði sér að lokum svo ég er mjög ánægð."
"Þetta spilaðist alveg eins og við bjuggumst við. Við vissum að þær myndu vera þéttar til baka og vera eins og þær eru, grófar og reyna að tefja, svo það kom okkur ekkert þannig á óvart."
Ingibjörg spilaði í miðverðinum í dag í fjarveru Sifjar.
"Mér leið mjög vel þar, það er náttúrulega mín staða svo alltaf þegar ég fæ tækifæri til að spila hana þá nýt ég þess vel."
Þá er fyrstu tveimur leikjunum hjá stelpunum okkar lokið í undankeppni EM og 6 stig í hús.
"Já geggjuð byrjun og gott að koma aftur á Laugardalsvöll og sýna okkar bestu hliðar. Við gætum ekki verið sáttari."
Hvernig finnst Ingibjörgu að spila hjá nýjum þjálfara?
"Já það eru ákveðnar áherslubreytingar en við höldum alveg í okkar gildi og erum alltaf mikið baráttulið og leggjum mikið upp úr því. Við erum að taka mikilvæg skref að bæta uppspilið svo það er eitthvað sem við erum að bæta undir hans stjórn."
Var Ingibjörg ánægð með mætinguna á völlinn í kvöld?
"Já, ég held það bara. Það heyrðist allavega vel í þeim. Það er alltaf virkilega gaman að fá mikið af fólki á völlinn."
Athugasemdir