Ásgeir í baráttunni í kvöld
„Ég er mjög svekktur, þetta var leikur sem mér fannst við alltaf eiga að vinna. Við vorum að spila töluvert betur en við höfum gert í síðustu leikjum og fengum góð færi í dag en náðum bara ekki að troða honum inn," sagði Ásgeir Eyþórsson, leikmaður Fylkis, eftir jafntefli gegn Leikni í kvöld.
Lestu um leikinn: Fylkir 0 - 0 Leiknir R.
Fylkir var búið að tapa síðustu tveimur leikjum gegn KR og FH. Þá tapaði liðið gegn Leikni í fyrri umferðinni.
„Mér fannst við svara ágætlega síðustu leikjum, það var búið að vera létt bras á okkur. Við þurftum að svara ýmsu, gerðum það ágætlega út á velli en náðum ekki að skora."
Hvernig fóruð þið að því að skora ekki?
„Það er frábær spurning, ég veit það ekki. Við skutum svolítið markmanninn þeirra í gang, hann var mjög góður. Þetta datt ekki með okkur í dag, eins og stundum."
Fannst þér þið eiga að fá vítaspyrnu undir lok fyrri hálfleiks?
„Já, mér fannst við klárlega eiga að fá vítaspyrnu. Ég eiginlega skil ekki hvernig... mér fannst hann (dómarinn) svo vel staðsettur. Allavega fyrir mér leit þetta út fyrir að vera pjúra víti."
En rauða spjalds dómurinn í lokin, fannst þér þetta vera réttur dómur?
„Nei, mér heyrðist menn vera búnir að sjá þetta aftur og voru ekki sáttir með þetta. Ég sá þetta mjög illa, maður var bara að keyra til baka. Daði var ekki sammála þessu allavegana, ég á eftir að sjá þetta aftur," sagði Ásgeir.
Nánar var rætt við Ásgeir og má sjá viðtalið í heild í spilaranum hér að ofan
