Liverpool varð enskur meistari eftir sigur á Tottenham um síðustu helgi. Arne Slot gerði sex breytingar á liðinu gegn Chelsea í dag á meðan Enzo Maresca hélt liðinu sínu óbreyttu frá sigri gegn Everton.

Chelsea byrjaði leikinn ansi við því Enzo Fernandez var aleinn inn á teignum og skoraði fyrsta mark leiksins eftir aðeins þriggja mínútna leik.

Noni Madueke var nálægt því að bæta við öðru marki stuttu síðar en skotið rétt framhjá markinu.

Cody Gakpo fékk fyrsta tækifæri Liverpool eftir tæplega tíu mínútna leik en Robert Sanchez var ekki í neinum vandræðum og greip boltann. Chelsea var betri aðilinn í fyrri hálfleik en mörkin urðu ekki fleiri.

Chelsea náði tveggja marka forystu eftir tæplega klukkutíma leik en það var ansi klaufalegt sjálfsmark. Virgil van Dijk hreinsaði boltann en það fór ekki betur en svo að boltinn fór í Jarell Quansah og í netið.

Liverpool náði að klóra í bakkann undir lokn þegar Van Dijk skoraði með skalla eftir hornspyrnu frá Alexis Mac Allister. Chelsea fékk vítaspyrnu undir lok leiksins þegar Quansah braut á Moises Caicedo og Cole Palmer skoraði og innsiglaði sigur Chelsea. Hans fyrsta mark í síðustu 12 leikjum.

Liverpool er því áfram með 82 stig á toppnum en Chelsea er í 5. sæti með 63 stig, jafn mörg stig og Newcastle sem er í 4. sæti.