Jónatan hefur átt stórglæsilegt fyrsta tímabil með Sogndal en hann kom til félagsins frá FH.

Eirik Lereng, liðsfélagi Jónatans, kom boltanum í eigið net á 39. mínútu áður en Jónathan lagði upp jöfnunarmarkið á 64. mínútu. Það voru svo þrettán mínútur eftir af leiknum er Lereng kom boltanum aftur í eigið net og lokatölur því 2-1 fyrir Oslóarliðinu.

Jónatan og Hörður Ingi Gunnarsson voru báðir í byrjunarliðinu en Jónatan fór af velli á 82. mínútu á meðan Hörður lék allan leikinn. Sogndal er í 7. sæti með 29 stig.

Andri Fannar og Willum Þór þreyttu frumraunir sínar

Willum Þór Willumsson var í byrjunarliði Go Ahead Eagles sem tapaði fyrir AZ Alkmaar, 2-0, í hollensku úrvalsdeildinni. Willum kom til Eagles frá BATE Borisov í sumar og var hann að þreyta frumraun sína með liðinu en hann fór af velli á 76. mínútu.

Andri Fannar Baldursson, sem gekk í raðir NEC Nijmegen frá Bologna í sumar, kom þá af bekknum á 88. mínútu er liðið tapaði fyrir Twente í dag, 1-0.

Markvörður Lilleström skoraði eftir sendingu frá Hólmberti

Hólmbert Aron Friðjónsson var í byrjunarliði Lilleström sem gerði 1-1 jafntefli við Tromsö. Þegar lítið var eftir af leiknum og Lilleström marki undir fór markvörður liðsins inn í teig þegar það fékk hornspyrnu.

Hólmbert skallaði boltann fyrir markið og tók Mads Christiansen, markvörður Lilleström, boltann á kassann áður en hann þrumaði boltanum í netið. Hólmbert lék allan leikinn og er Lilleström í 2. sæti norsku úrvalsdeildarinnar með 37 stig.

Patrik Sigurður Gunnarsson stóð í marki Viking sem gerði 2-2 jafntefli við Sandefjord. Samúel Kári Friðjónsson var ekki með Viking í dag sem situr í 5. sæti með 29 stig.

Brynjólfur Andersen Willumsson lék allan leikinn er Kristiansund tapaði fyrir toppliði Molde, 3-2. Kristiansund náði tveggja marka forystu en glutraði henni niður áður en fyrri hálfleikurinn var úti og svo kom sigurmarkið í upphafi þess síðari.

Kristiansund er áfram á botninum með 6 stig en Molde á toppnum með 42 stig.

Brynjar Ingi Bjarnason var sjöunda deildarleikinn í röð á bekk Vålerenga sem vann 4-0 sigur á Álasundi. Vålerenga er í 6. sæti með 26 stig.

Davíð Kristján og Aron Bjarna í sigurliðum

Davíð Kristján Ólafsson lék allan leikinn er Kalmar lagði AIK að velli, 1-0, í sænsku úrvalsdeildinni. Kalmar er í 7. sæti með 27 stig og þá spilaði Aron Bjarnason allan leikinn í 2-1 sigri Sirius á Malmö en Óli Valur Ómarsson sat allan tímann á bekk Sirius sem er í 9. sæti með 24 stig.

Sveinn Aron Guðjohnsen og Hákon Rafn Valdimarsson voru báðir í byrjunarliði Elfsborg sem gerði 1-1 jafntefli við MJällby. Sveinn fór af velli á 77. mínútu en Elfsborg er í 10. sæti sænsku deildarinnar með 22 stig.

FCK skoraði fjögur

Hákon Arnar Haraldsson var í byrjunarliði FCK sem vann 4-1 sigur á nágrönnum þeirra í Bröndby. Ísak Bergmann Jóhannesson kom inná sem varamaður á 83. mínútu og þá fór Hákon Arnar af velli á sama tíma.

Þetta var annar sigur FCK sem er með sex stig í 5. sæti dönsku úrvalsdeildarinnar.

Mikael Neville Anderson var ekki með AGF sem vann OB, 2-1, en Aron Elís Þrándarson var í liði OB og fór af velli á 71. mínútu. AGF er í 3. sæti með 7 stig en OB á botninum með 1 stig.

Viðar Ari Jónsson var þá í liði Honved sem tapaði fyrir Fehervar, 4-0. Viðar fór af velli undir lok fyrri hálfleiks. Liðið er á botninum eftir tvo leiki og án stiga.

Jón Dagur Þorsteinsson var í byrjunarliði Leuven sem tapaði fyrir Antwerp, 4-2, í belgísku deildinni. Hann fór af velli á 58. mínútu leiksins. Leuven er með sex stig eftir tvær umferðir.