Jökull í stuði eftir að Afturelding tryggði sig upp.
Jökull í markinu hjá Aftureldingu í sumar.
Með bikarinn á Laugardalsvelli.
„Þetta er búið að vera geggjað, eitt það skemmtilegasta í lífinu," sagði markvörðurinn Jökull Andrésson í samtali við Fótbolta.net í dag. Jökull hjálpaði á dögunum uppeldisfélagi sínu, Aftureldingu, að komast upp í efstu deild í fyrsta sinn.
Jökull kom á láni frá enska félaginu Reading á miðju tímabili; hann var stórkostlegur og var valinn í lið ársins er Afturelding vann sig upp í gegnum umspilið í Lengjudeildinni.
Jökull kom á láni frá enska félaginu Reading á miðju tímabili; hann var stórkostlegur og var valinn í lið ársins er Afturelding vann sig upp í gegnum umspilið í Lengjudeildinni.
„Maður vaknar brosandi á hverjum einasta degi. Ég er búinn að vera að melta þetta og allt sem hefur verið að gerast. Það er alltaf einhver að hrósa manni og það er erfitt að gleyma þessu. Það er ekki hægt."
Fór að hágráta
Hann sér alls ekki eftir ákvörðun sinni að koma heim í Aftureldingu í sumar.
„Nei, ég geri það ekki. Dóttir mín kom í heiminn og svo gerðist þetta (að Afturelding fór upp). Þetta hafa verið tveir, þrír bestu mánuðir lífs míns. Ég hef mörgum að þakka; kærustunni minni, mömmu og pabba og bræður mínir. Við erum svo mikil fjölskylda og ég gæti eiginlega ekki verið heppnari."
Þegar flautað var af á Laugardalsvelli, þá byrjuðu tárin að flæða.
„Ég fór að hágráta," segir Jökull. „Ég er búinn að hugsa oft út í það hversu mikið ég fór að gráta. Maður þurfti aðeins að róa sig niður. Hvað getur maður gert? Sérstaklega líka eftir síðustu tvö árin hjá mér í fótbolta. Þetta hefur verið meira niður en upp og svo fær maður loksins svona þar sem allt gengur vel. Manni líður aftur vel. Þetta er ástæðan fyrir því að ég er í fótbolta, að líða vel og njóta. Loksins er maður að njóta og með öllu þessu magnaða fólki í Mosfellsbæ. Það er öðruvísi tilfinning sem maður getur bara varla útskýrt."
Hvað gerist næst?
Jökull hafði mikil áhrif á Aftureldingu og var eftir tímabilið valinn í lið ársins í Lengjudeildinni. Hann segist hafa verið glaður að geta hjálpað sínum mönnum og leið honum vel frá fyrsta degi í liðinu. En verður hann áfram næsta sumar?
„Við sjáum til. Þetta er dagur frá degi núna. Ég fer aftur núna til Reading og klára einhvern smá tíma þar. Svo er allt í boði. Ég er ógeðslega spenntur fyrir því sem er framundan. Ég ætla að fá það besta úr sjálfum mér. Ég er að leitast eftir því: Að ég sé hamingjusamur."
Menn í Mosfellsbæ vilja halda Jökli. Það er ekkert leyndarmál.
„Skiljanlega, miðað við hvernig allt hefur gengið. Þetta eru allt frændur og frænkur mínar upp í stúku. Þetta er ást, ein stór ást. Þú vilt ekki valda fólki í Mosfellsbæ vonbrigðum, treystu mér. Við sjáum hvernig allt fer. Ég held að allir verði glaðir á endanum," sagði Jökull.
Allt viðtalið má sjá í spilaranum hér að ofan.
