England: Watford vann botnslaginn í Norwich

Norwich tók á móti Watford í botnslag ensku úrvalsdeildarinnar í kvöld og komust gestirnir yfir eftir 76 sekúndur.

Gerard Deulofeu stal þá boltanum af Emiliano Buendia og sýndi gæði sín með að klára nokkuð erfitt færi upp á eigin spýtur.

Heimamenn komust nálægt því að jafna en Watford hélt út og leiddi í hálfleik. Andre Gray, sem kom inn af bekknum fyrir meiddan Ricardo Pereyra, tvöfaldaði svo forystuna í upphafi síðari hálfleiks eftir undirbúning frá Deulofeu.

Christian Kabasele, varnarmaður Watford, fékk sitt seinna gula spjald á 65. mínútu og voru gestirnir því manni færri út leikinn. Það kom ekki að sök og lokatölur 0-2.

Watford er því komið af botninum og er með 8 stig eftir 12 umferðir. Norwich vermir nú botnsætið, með 7 stig.