Rúnar Páll Sigmundsson.
Stjarnan mætir eistneska liðinu Levadia Tallin í fyrstu umferð Evrópudeildarinnar í kvöld klukkan 20:00. Stjörnumenn hafa kynnt sér Levadia vel og þjálfarateymi liðsins sá leik Levadia og Flora í Eistlandi um síðustu helgi. Fjalar Þorgeirsson, í þjálfarateymi Stjörnunnar, hefur horft á mjög marga leiki með Levadia.
„Fjalar (Þorgeirsson) er búinn að eyða óendanlegum tíma í að leikgreina þá. Hann er orðinn algjör sérfræðingur í eistneska boltanum og þekkir hann út í gegn," sagði Rúnar Páll Sigmundsson, þjálfari Stjörnunnar, við Fótbolta.net.
„Við fórum til Eistlands um helgina og sáum þá spila gegn Flora og við þekkjum þetta lið í bak og fyrir. Vonandi náum við að klára þennan leik vel á heimavelli með því að halda hreinu og skora nokkur mörk."
Spænska liðið Espanyol bíður í 2. umferð eftir sigurvegaranum úr viðureign Stjörnunnar og Levadia.
„Það er svakalega mikil gulrót að geta mætt þeim. Sviðið gerist ekki mikið stærra en það. Það bíður okkur verðugt verkefni ef við náum að klára þetta verkfeni."
Hér að ofan má sjá viðtalið í heild sinni.
Athugasemdir
