„Mér fannst þetta geggjaður leikur af okkar hálfu. Það er helvíti erfitt að eiga við ÍR-ingana, þeir liggja djúpt niðri og eru sterkir í föstum leikatriðum, halda fókus allan tímann. Mér fannst þeir gera það vel," sagði Vilhjálmur Kaldal Sigurðsson leikmaður Þróttar eftir 3-1 sigur gegn ÍR í kvöld.
Lestu um leikinn: Þróttur R. 3 - 1 ÍR
Vilhjálmur byrjaði leikinn á bekknum en kom inn á, á 70. mínútu. Þá var leikurinn jafn, en hann lagði svo upp tvö mörk.
„Maður reynir alltaf að gera sitt besta bara og við erum með hörku hóp. Samkeppnin um þessar framherjastöður er gríðarlega mikil. Liam er funheitur, Aron, og svo er ég og Viktor á bekknum. Við erum allir að berjast um þessar stöður. Þetta er kannski bara svolítið erfitt fyrir Venna (Sigurvin Ólafsson) að velja úr þessu. Alltaf þegar maður fær séns, þá verður maður að gera sitt besta og reyna að fá sénsinn í byrjunarliðið næst. Mér fannst ég gera það í dag, en hver veit," sagði Vilhjálmur.
Eftir svona frammistöðu þá vonast hann til að fá að byrja næsta leik.
„Maður treystir Venna bara að hann velur sterkasta liðið hverju sinni. Ef mitt hlutverk er að koma af bekknum, þá geri ég það bara eins vel og ég get," sagði Vilhjálmur.
Þróttarar eru fimm stigum frá toppsætinu þegar fimm leikir eru eftir. Toppbaráttan er gríðarlega jöfn og það verður spennandi að sjá hvernig loka umferðirnar fara.
„Við eigum Njarðvík úti á sunnudaginn, það verður hörku leikur. Ég vona að Þróttararnir sem mættu hérna í dag fylli stúkuna. Það væri geðveikt, ég vona að þeir komi allir til Njarðvíkur og styðji okkur áfram," sagði Vilhjálmur.
Stuðningsmenn voru fjölmennir og háværir í dag. Ein besta stemning sem undirritaður hefur séð í Lengjudeildinni í sumar.
„Mikið credit á þá, þeir voru alveg geggjaðir (stuðningsmennirnir). Það var líka gaman að sjá ÍR-ingana þeir eru skemmtilegir, skemmtilegt að hlusta á þá. Mér fannst Köttararnir (stuðningsmannasveit Þróttara) hafa þetta í dag og það skilaði sigrinum," sagði Vilhjálmur.
Viðtalið má sjá í heild sinni í spilaranum hér fyrir ofan.
