Brasilíski varnarmaðurinn Marquinhos er mikils metinn og hefur verið eftirsóttur af stærstu félögum Evrópu. Hann er 25 ára gamall og gríðarlega fjölhæfur, enda reglulega notaður sem miðjumaður í liði Frakklandsmeistara Paris Saint-Germain.
Hann er búinn að skrifa undir nýjan samning við PSG sem gildir í þrjú og hálft ár, eða til sumarsins 2024.
Marquinhos gekk í raðir PSG frá AS Roma sumarið 2013, þegar hann var aðeins 19 ára gamall. Síðan þá hefur hann spilað 271 leik fyrir PSG og unnið fjórtán titla með félaginu.
Í viðtali í fyrra sagðist varnarmaðurinn vilja spila fyrir PSG út ferilinn.
Marquinhos er mikilvægur hlekkur í brasilíska landsliðinu og á 47 keppnisleiki að baki fyrir þjóð sína.
Það verða miklar breytingar á leikmannahópi PSG eftir þessa leiktíð þar sem Edinson Cavani, Thiago Silva, Thomas Meunier og Laywin Kurzawa verða allir samningslausir.
PSG trónir á toppi frönsku deildarinnar og mætir Borussia Dortmund í 16-liða úrslitum Meistaradeildarinnar.
Athugasemdir