Hann skoraði fyrir Manchester United í 2-1 tapi gegn Young Boys í gær. Hann var tekinn af velli um miðbik seinni hálfleiks en tók þátt í leiknum af hliðarlínunni.

Það voru teknar myndir af Ronaldo í gær - á meðan leik stóð - þar sem hann var á hliðarlínunni að garga inn á völlinn. Við hlið hans er Ole Gunnar Solskjær, stjóri Manchester United. Rætt var um þetta á BT Sport.

„Ef ég er stjórinn, þá hefði ég sagt honum að setjast niður," sagði Rio Ferdinand, fyrrum leikmaður Man Utd, og fyrrum liðsfélagi Ronaldo.

„Hann er ástríðufullur náungi og vill vinna. Hann þráir ekkert meira en sigur og getur ekki haldið því inn í sér."

Það var eftirminnilegt í úrslitaleik EM 2016 er Ronaldo var nánast byrjaður að stýra landsliði Portúgal af hliðarlínunni. Portúgal vann þann leik.