Skaut á son bróður síns eftir leik
Þorvaldur Örlygsson þjálfari Keflavíkur.
„Við vildum fá þrjú stig og gerðum allt til þess að gera það. Lögðum okkur fram, sköpuðum færi og fengum færi en kannski ekki nógu mörg opin færi," sagði Þorvaldur Örlygsson þjálfari Keflavíkur eftir markalaust jafntefli við KA í kvöld.
Lestu um leikinn: Keflavík 0 - 0 KA
„En við gáfum ekki mikið af færum á okkur og vorum með stjórn á leiknum án þess að ná að klára. Það er svekkjandi því við vorum með leikinn í okkar hendi. Það er svekkjandi að ná ekki í þrjú stig," hélt hann áfram.
Keflavík er sjö stigum frá KA sem er í 2. sæti eftir leiki kvöldsins. Liðið tapaði fyrir toppliði Grindavíkur í síðustu umferð en er tækifæri Keflavíkur á að komast strax upp aftur að renna þeim úr greipum?
„Ég get ekki svarað því, hvort sem við hefðum unnið eða ekki þá höldum við áfram. Við náðum ekki þessum tveimur leikjum og spiluðum ágætis leiki báða tvo og vorum með stjórn á þeim en það vantaði að skora til að breyta leikjunum okkar og það telur."
Þorvaldur sagði að Sigurbergur Elísson sem spilaði ekkert í dag hafi verið meiddur en nánar er rætt við hann í sjónvarpinu að ofan.
Almarr Ormarsson leikmaður KA og bróðursonur Þorvalds kvartaði undan flautukonsert dómarans í viðtali eftir leik og um það sagði Þorvaldur:
„KA menn eru búnir að væla í allt sumar og sérstaklega heima þar sem allt hefur gengið upp hvað varðar dómgæslu. Þeir eru þá ekkert vanir því að fá réttláta dóma, það verður að segjast. Hann getur bullað eins og hann vill."
