Hinn frægi vikulegi fundur
Enn og aftur komum við að hinum umtalaða vikulega fundi aganefndar sem hittist bara á þriðjudögum. Hið löngu úrelta fyrirbæri sem virðist ótrúlega erfitt að koma út úr íslenska fótboltakerfinu. Leikmenn fara ekki í sjálfkrafa bann vegna uppsafnaðra áminninga heldur þarf aganefndin að hittast einu sinni í viku og stimpla einhverja pappíra.

Ef lið á tvo leiki í viku getur leikmaður verið búinn að safna spjöldum í fyrri leiknum til að fara í bann en samt spilað seinni leikinn því aganefndin vinnur bara á þriðjudögum.

Umspil Lengjudeildarinnar er keppni sem er ekki lík annarri hér á landi og strax yrði það ákveðin lausn að hafa aukafund aganefndar milli undanúrslitaleikjanna. Þó best væri náttúrulega að menn færu bara beint sjálfkrafa í bann eftir að hafa safnað gulum spjöldum!

Á Diouck að fá tveggja leikja bann?
Hefði Elmar í fyrra og ætti Diouck núna að fá lengra bann fyrir að leika þennan leik til að hagræða því í hvaða leik bannið er afplánað?

Í eðlilegum kringumstæðum ætti það að vera staðan. En mitt mat er að í þessu tilfelli séu bara kringumstæðurnar alls ekki eðlilegar. Það er öskrandi galli í kerfinu og agareglum tengdum umspilinu og það er raunverulega vandamálið sem á að horfa í.

Reglunum breytt en þó ekki nóg
Skiljanlega eiga að vera einhverjar afleiðingar ef menn safna spjöldum og ég skil KSÍ að vilja ekki fara þá leið að gefa öllum bara frípassa í umspilinu eins og einhverjir hafa kallað eftir. Það er eðlilegt að menn þurfi að taka afleiðingum þess að safna spjöldum. Þegar kemur að svona keppni þarf þó að aðlaga reglurnar.

Reglunum var breytt eftir Elmars-uppákomuna í fyrra. Þeir leikmenn sem koma inn í undanúrslitin á þremur gulum spjöldum eða færri (fjögur gul þarf til að fá bann) fá eitt gult spjald dregið frá spjaldafjölda sínum á tímabilinu. Þannig ef leikmaður er með þrjú gul spjöld eftir 22 leiki þyrfti leikmaðurinn að fá gult spjald í báðum undanúrslitaleikjunum til að missa af úrslitaleiknum vegna leikbanns.

Leikmaður á sex gulum spjöldum (sjö gul þarf til að fá aftur bann) eftir 22 leiki er hinsvegar áfram einu gulu spjaldi frá leikbanni. Þannig var raunin með Oumar Diouck í gær, hann kom inn í leikinn með sex gul á bakinu.

Njarðvík tekur meiri áhættu en Afturelding
Njarðvík vann fyrri leikinn í gær 2-1. Líklegt er að ef staðan hefði verið 2-2 hefði Diouck ekki vísvitandi fengið rautt því Njarðvík hefði talið sig hafa meiri þörf á honum í seinni leiknum. Diouck er einn besti leikmaður Lengjudeildarinnar.

Njarðvík 'gamblar' á að geta klárað Keflavík á sínum heimavelli eftir 2-1 forystu úr fyrri leiknum og þannig nýtt mikilvæga krafta hans í úrslitaleiknum um sæti í Bestu deildinni.

Afturelding vann fyrri leikinn gegn Fjölni 3-1 í fyrra, gegn andstæðingi sem var ekki eins öflugur og Keflavík í ár að mínu mati. Því má segja að Njarðvík sé að taka meiri áhættu en Afturelding með því að senda Diouck 'í frí' í seinni leiknum gegn Keflavík.