Herrera setti inn færslu á Twitter þar sem hann segist hafa byrjað að elska fótboltann í þeirri mynd að hann sé byggður fyrir stuðningsmennina.

Herrera er fæddur í Bilbao og segist hafa alist upp við þann draum að hans lið gæti unnið sér það inn að spila gegn bestu liðum Evrópu. Þannig draumar hverfi með nýrri Ofurdeild þar sem stærstu liðin eigi föst sæti og spili við hvert annað.

„Ég trúi á bætta Meistaradeild en ekki á að þeir ríku steli því sem fólkið skapaði, sem er fallegasta íþrótt jarðarinnar," segir Herrera.

Mesut Özil hefur einnig stigið fram á Twitter og lýst því yfir að hann sé mótfallinn Ofurdeildinni. „Gleðin varðandi stórleikina er að þeir eru bara einu sinni eða tvisvar á ári, ekki í hverri viku," segir Özil.