Bjarni Þór verður ekkert með á þessari leiktíð
FH gerði 0-0 jafntefli við Lahiti í Kaplakrika í kvöld eftir að hafa unnið úti í Finnlandi 0-3. FH er því komið áfram í 2. umferð forkeppni Evrópudeildarinnar þar sem þeir mæta Apoel Haifa. Bjarni Þór Viðarsson leikmaður FH er búinn að vera meiddur lengi en var í stúkunni í dag og var ánægður með leik sinna manna.
Lestu um leikinn: FH 0 - 0 Lahti
„Þetta var frekar rólegt en fagmannlega gert hjá FH, það er svolítið erfitt að koma inn í svona leik eftir að hafa unnið útileikinn 3-0 og þurfa að klára þetta."
Bjarni sagði það vissulega svekkjandi að geta ekki spilað með, sérstaklega í svona leik þegar aðstæður eru góðar og liðið að spila í Evrópukeppni.
„Já það er það, sérstaklega þegar veðrið er svona gott og fullt af fólki af vellinum. Ég er nátturulega búinn að vera lengi frá og verð að taka því og verð frá í einhverja mánuði í viðbót."
Bjarni verður ekkert með á tímabilinu vegna meiðsla en getur þó æft og segir að hann verði bara að styðja strákana og bíða þolinmóður eftir að komast aftur á völlinn.
„Ég fékk jákvæðar fréttir frá lækninum í gær en ég verð bara að bíða þolinmóður og verð ekkert með á þessu tímabili. Ég er að æfa með FH liðinu en ég er ekki tilbúinn í að fara að spila, er ekki í leikformi og tek engar áhættur."
Athugasemdir
