„Ég er ánægður með frammistöðuna í dag, mér fannst við vera mjög öflugir varnarlega. Við stoppuðum flestar þeirra sóknir og gerðum það vel." Sagði Magnús Már Einarsson þjálfari Aftureldingar eftir að liðið hans sigraði Fjölni 3-1 í fyrri leiknum í undanúrslitum umspilsins í Lengjudeildinni.
Lestu um leikinn: Afturelding 3 - 1 Fjölnir
„Það var mikil trú, mikil liðsheild hjá okkur. Það var það sem skilaði þessu við kláruðum þetta, og frábært að fá mark í lokin. Fyrst og fremst þá vil ég þakka stuðningsmönnum fyrir, þetta var geggjaður stuðningur hérna á heimavelli í kvöld. Að spila undir flóðljósunum, á blautum velli, þetta var ótrúleg stemning og geggjað kvöld. Við þurfum bara að fá það sama á mánudaginn, fá sömu orku frá strákunum og sömu stemningu í stúkuna og klára dæmið. Það er bara hálfleikur, það er nóg eftir og við þurfum að vera klárir á mánudaginn því það verður hörku leikur í Grafarvoginum."
Seinni leikurinn í þessum undanúrslitum verður spilaður næstkomandi mánudag klukkan 15:45.
„Ég hvet bara alla Mosfellinga að mæta á völlinn og ef menn þurfa að taka á sig að fara fyrr úr vinnu eða jafnvel skrópa í skóla. Ég er nú ekki almennt að því að hvetja fólk að skrópa í skólanum en ef það er einhvertíman sem þú skrópar í skólanum þá er það þarna. Fólk á að mæta á völlinn og hjálpa okkur í baráttunni."
Elmar Kári fékk gult spjald í fyrri hálfleik og var því á leiðinni í bann í úrslitaleiknum skyldi Afturelding komast þangað. Þetta er vegna skringilegra reglna hjá KSÍ en Elmar fékk sitt annað gula spjald eftir leikinn sem þýðir að hann mun þá taka út sitt bann í komandi leik á mánudaginn.
„Það er eitthvað brot þarna undir lokin, sem hann fær síðan spjald fyrir eftir leik. Ég vil bara hrósa Elmari Kára fyrir geggjaðan leik, hann skorar geggjað mark, á stóran þátt í því að fá vítaspyrnu í lokin. Þó að hún hafi ekki farið eins og við vildum fara þá á hann það skuldlaust með Sævari hvernig þeir bjuggu það til. Mér fannst hann spila frábærlega, sérstaklega í seinni hálfleik vitandi það að hann var búinn að fá þetta spjald að ná að stilla hausinn og ná að setja einbeitingu á verkefnið. Mér finnst það frábærlega gert hjá honum. Ég er hrikalega ánægður með hann í dag eins og allt liðið."
Magnús vill ekki meina að seinna gula spjaldið hafi verið viljandi svo Elmar myndi ekki vera í banni í úrslitaleiknum.
„Nei hann fær bara spjald þarna í lokin. Hann metur það þannig, Þórður að þetta hafi verið spjald, þetta var eitthvað klafs þarna í lokin og þá er það bara þannig. Tvö gul og rautt og hann er þá í banni í næsta leik."
Viðtalið má sjá í heild sinni í spilaranum hér fyrir ofan.
