Lögreglan í Merseyside er með tíst sem beindust að Jordan Pickford og Richarlison til rannsóknar. Reiðir stuðningsmenn Liverpool létu í sér heyra á Twitter eftir 2-2 jafntefli Everton og Liverpool um helgina.
Pickford fékk að heyra það óþvegið fyrir að strauja Virgil van Dijk illa innan eigin vítateigs. Hollenski varnarjaxlinn skaddaði krossband og verður frá keppni fram á vor.
Þá voru Richarlison ekki vandaðar kveðjurnar eftir að hann lét reka sig af velli á 90. mínútu þegar hann tæklaði Thiago Alcantara illa.
Einhver ummælin hafa farið býsna langt yfir strikið og er lögreglan búin að skerast í leikinn.
„Orðræðan í þessum tístum er ólíðandi og við lítum þetta alvarlegum augum," sagði talsmanneskja lögreglunnar.
Athugasemdir
